Hi. Here is my interpretation of a Filipino serenade song, "O Ilaw". Listen to the song first ;) .
"O, ilaw, sa gabing malamig"
At nagsimulang punuin ng binatang si Ricky ng kanyang magandang tinig at marahan na gitara ang buong eskinita ng phase 6. Mapusok si Ricky at mataas ang reputasyon sa phase 6. Sakbit niya ang lumang gitara, sinamahan pa ng rosas na namumula sa tingkad. Lahat ay nakikinig sa kanyang saliw na kaniyang inialay kay Lela.
"Wangis mo'y bituin sa langit."
Nakalipas na ang pasko pero nakasabit pa rin ang mga nagniningning na parol sa mga bintana. Hanay-hanay ang mga kumukutitap na parol at krismas dekor sa buong phase 6. Lubos na maantig ang puso ng sinumang mapadaan sa phase 6 dahil sa saliw at liwanag na dumadaloy sa paligid nito.
"O, tanglaw, sa gabing tahimik"
Ngunit, natatangi ang bahay ni Lela sapagkat sarado pa ang mga krismas layts nito. Sarado ang mga bintana, nakasarado pati ang gate. Tila natutulog pa ang buong bahay at tanging tunog lamang sa TV ang maririnig mula sa labas.
"Larawan mo, Lela"
At mas lalong sumidhi ang boses ni Ricky. Kanyang naalala ang dampi ng mga buhok ni Lela sa paghawi niya sa mga ito. Sa kaniyang isip ay naririnig niya ang boses nito na sadyang walang katulad. Ito'y tinig na hindi-hinding makakalimutan na sumasama pa sa isipan kahit sa pagtulog.
"nagbigay pasakit. Ay!"
Hindi pa rin nagpaparamdam ang dalaga sa binatang umaawit ng kaniyang pagibig. Tila natutulog ang buong bahay sa gitna ng buhay na buhay na eskinita ng phase 6. Si Osang, ang kapatid na kasakasama ni Lela sa bahay, ay umuwi na mula sa pamimili ng grocery para pang media noche kinabukasan. Napansin niya ang binatang laging bumibisita sa bahay, ngunit mas nakapukaw pansin sa kanya ang hindi pagkibo ni Lela sa mga saliw ni Ricky.
"Gising at magbangon"
Sinusian na ni Osang ang gate at siya'y pumasok. Nagtataka siya kung bakit hindi pa rin binubuksan ni Lela ang mga krismas layts. Sigurado si Osang na hindi tinatakasan ni Lela si Ricky dahil kung siguradong narinig niya ang mga kalabit ni Ricky sa gitara, siguradong mapapasayaw na ang puso nito. Inakyat ni Osang ang kwarto ni Lela at ito'y kaniyang kinatok.
"sa pagkagupiling"
Rinig na rinig ni Osang ang mapusok na awitin ng binata mula sa loob ng bahay. Patay ang ilaw ngunit naiwang bukas ang TV.
"Sa pagkakatulog"
Sinubukang akyatin ni Osang si Lela dahil baka sa may problema ito. Kumatok siya ng maraming beses ngunit walang sumasagot mula sa loob.
Mas pinaigting pa ni Ricky ang kaniyang pag-gigitara. Lumakas ang kaniyang boses sa pagdama niya sa kanta. Narinig ng buong kapitbahay ang nakakaaliw na saliw ni Ricky para sa dalaga. Maraming nanunood at nagsisipalakpakan.
"na lubhang mahimbing."
Hindi pa rin nagbubukas ng pinto si Lela. "Lela! Si Osang ito! May problema ba? Pagbuksan mo na ako, nag-away ba kayo ni Ricky?", palambing na sinabi ni Osang kay Lela sa tapat ng silid nito. "Lela makikinig ako."
"Buksan ang bintana, at ako'y dungawin "
Hindi matinag ang titig ni Ricky sa bintana ng kwarto ni Lela. Nais niyang masilayan ang kagandahan ni Lela sa gabing iyon.
" Nang mapagtanto mo a"
Mas lalong lumakas ang katok ni Osang. Natataranta siya. "Lela! Lela! Si Osang ito!", ngunit wala pa ring kibo si Lela. Naalala ni Osang na may duplicate pala siya ng susi ng kwarto ni Lela. Binuksan niya ito.
"ng tunay kong pagdaing."
Kinahinaan ng loob si Ricky. Tila ay ayaw pansinin ni Lela ang kaniyang awitin. Inulit muli ng binata ang kaniyang awitin.
"Gising at magbangon
sa pagkagupiling "
At may namataang anino sa mga bintana ni Lela. Lumakas ulit ang loob ng binata. Lumakas ang palakpakan at hiyawang ng mga kapitbahay.
"Sa pagkakatulog"
Binuksan ni Osang ang bintana ng kwarto. "Tulong! Tumawag kayong ambulansya!"
"na lubhang mahimbing."
Mula sa labas ay dumungaw ang katawan ni Lela na nakasabit sa lubid sa leeg. Napatigil ang palakpakan at hiyawan ng tao. Napatigil ang pag-awit ni Ricky. Biglang nawala ang liwanag at saliw na dumaloy sa phase 6.
Dinala si Lela sa ospital ngunit bago pa man siya matagpuan ay hindi na ito humihinga. Huli na ang lahat. Gumuho ang mundo ni Ricky.
Makailang linggo pagkatapos ng kaniyang pagkamatay ay natagpuan ni Osang ang isang liham ni Lela pa kay Ricky. Iniabot ito ni Osang kay Ricky. Binasa ni Ricky ang liham.
"Buksan ang bintana
at ako'y dungawin
Nang mapagtanto mo
ang tunay kong pagdaing."
wakas